...

- ვინ როგორ იცნობს საქართველოს წარსულს. რამდენად იციან კულტურული ძეგლების ისტორია და მნიშვნელობა, - სენაკის დებატ-კლუბმა ეს საკითხი მიიჩნია აქტუალურად და თემის ირგვლივ დისკუსია გამართა.

მონაწილეები სრულიად იზიარებდნენ იმ აზრს, რომ აუცილებელია ისტორიული ძეგლების დაცვა, ვინაიდან ეს ძეგლები საუკუნეებს ითვლიან და  მათში ასახულია უძველესი ქართული კულტურა.

„ყველა ქართველი ვალდებულია, იცნობდეს საკუთარ ისტორიულ მემკვიდრეობას, გაუფრთხილდეს და მომავალ თაობას შემოუნახოს,"  - აღინიშნა დისკუსიისას.

ითქვა, რომ საქართველოს ყველა მხარე მდიდარია ისტორიულ-კულტურული ძეგლებით და ახალგაზრდობამ წარსულის პატივისცემა საკუთარი კუთხის ისტორიის შესწავლით უნდა დაიწყოს.

შეხვედრაზე ნათქვამი მალე რეალობად აქციეს - დებატების დასრულების შემდეგ ახალგაზრდები სენაკის მხარეთმცოდნეობის მუზეუმს ესტუმრნენ.

გადაწყდა, მომდევნო თვეებში სხვა კულტურული  ძეგლები მოინახულონ და უფრო მეტი გაიგონ მათ შესახებ.  

პროექტი ხორციელდება ორგანიზაცია „ქალები ქალებისათვის"

(Kvinna till Kvinna) მხარდაჭერით (შვედეთი)

- რა პრობლემები შეიძლება მოჰყვეს ნაადრევ ქორწინებას, რა ასაკი ითვლება ქორწინებისთვის იდეალურ ზღვრად, რას ამბობს საკანონმდებლო სისტემა, რას ფიქრობენ თავად ახალგაზრდები - ამ საკითხებზე გაიმართა დისკუსია ხურჩის ახალგაზრდულ ცენტრში.

მონაწილეებმა რეალური მაგალითებით განიხილეს, რა პრობლემები და სირთულეები შეიძლება შეხვდეს გოგონას, რომელიც სკოლის ასაკში ქმნის ოჯახს. პრობლემებში პირდაპირ მიუთითეს, რომ ასეთ შემთხვევაში გოგონები ხშირად ხდებიან ძალადობის მსხვერპლნი: ვერ აგრძელებენ სწავლას, ნაკლებად აქვთ არჩევანის უფლება, დამოკიდებულნი ხდებიან სხვებზე.

ახალგაზრდების აზრით, ნაადრევი ქორწინება პირდაპირ კავშირშია დისკრიმინაციასთან.  ქორწინების ოპტიმალური ასაკის განსაზღვრისას აზრთა სხვადასხვაობა  შეიმჩნეოდა. მაგრამ ერთსულოვანი იყვნენ იმაში, რომ ეწინააღმდეგებიან ყველაფერს, რაც გოგონათა დისკრიმინაციას უკავშირდება.   

პროექტი ხორციელდება ორგანიზაცია „ქალები ქალებისათვის"

(Kvinna till Kvinna) მხარდაჭერით (შვედეთი)

ფონდი „სოხუმი" გოგონათა დღეს ფოტოაქციით აღნიშნავს. 11 ოქტომბერს დასავლეთ საქართველოს ექვს ქალაქში, ქუთაისი, წყალტუბო, ხონი, სენაკი, ფოთი, ხურჩა (აფხაზეთის საზღვრისპირა სოფელი), ახალგაზრდულ ცენტრებში  ფოტოსესია მოეწყო. ახალგაზრდებმა ფოტოსურათებით  გამოხატეს პროტესტი ყველა ფორმის ძალადობის მიმართ და  დააფიქსირეს, რომ გენდერულ დისბალანსს, დისკრიმინაციას, იძულებით ქორწინებას ეწინააღმდეგებიან და რომ ბავშვები უსაფრთხო და მზრუნველ გარემოში უნდა იზრდებოდნენ.

გოგონათა საერთაშორისო დღე 11 ოქტომბერს 2012  წელს გაეროს მიერ მიღებული რეზოლუციით  აღინიშნება. ამ დღის მიზანია, ყურადღება მიექცეს  გენდერული დისბალანსის  პრობლემას ბიჭებსა და გოგონებს შორის, რომლის შედეგია სრულფასოვანი განათლებისა და  სამედიცინო მომსახურების არათანაბარი ხელმისაწვდომობა, სიღარიბე, დისკრიმინაცია და იძულებითი ქორწინება.