|
სამოქალაქო ინტერესების დაცვის კუთხით ფონდი „სოხუმის" ქალთა ლიგის საქმიანობა ხშირად ხვდება მედიის ყურადღების ცენტრში. ამჯერად ტელერადიოკომპანია „რიონის" საკვირაო გადაცემა „კვირის თემაში" გასულმა სიუჟეტმა ბათუმის ქალთა კლუბის ადვოკატირების ჯგუფის მუშაობის შესახებ მოგვითხრო.
მშობლები და პედაგოგები აღნიშნავენ, რომ ქობულეთის მე-2 ბაგა-ბაღის შეშით დროული მომარაგების საკითხი კლუბის ადვოკატირების ჯგუფის ძალისხმევით გადაწყდა; უხვნალექიანი ბათუმის რიგ უბნებში კოლექტორები დაბინძურდა, რის გამოც ნიაღვრების საშიშროება გაჩნდა. მერიის შესაბამისი სამსახურის მესვეურნი არ მალავენ, რომ პრობლემის გადაწყვეტა კლუბის ადვოკატირების ჯგუფის აქტიურობამ განაპირობა.
მიღწეულმა წარმატებებმა მეტი სტიმული მისცა ჯგუფის წევრებს. სადღეისოდ ადვოკატირების დღის წესრიგში რამდენიმე საკითხი დგას (მწვანე კონცხის მიმდებარე ტერიტორიების გაწმენდა; ქალაქ ქობულეთის რიგ ქუჩებში გადასასვლელების მოწესრიგება), შესაბამისი სტრატეგიაც არსებობს.
სიუჟეტმა ნათელყო, რომ საზოგადოებისა და ოფიციალური სტრუქტურების ნდობის ხარისხი ქალთა კლუბის საქმიანობისადმი - იზრდება. | 