...

თვითმმართველი ქალაქ ქუთაისის საკრებულოში შედგა გენდერული საკონსულტაციო საბჭოს პირველი სხდომა.

სხდომაზე არჩეულ იქნა საბჭოს მმართველობა, საკრებულოს წევრები: თავმჯდომარედ გიორგი შავგულიძე, მოადგილედ - რაულ ქორჩილავა.

საბჭოს დებულების სამუშაო ვარიანტის განხილვისას დაფიქსირდა რეკომენდაციები და წინადადებები, განისაზღვრა სამომავლო მუშაობის მიმართულებები.

„ჩვენი საქმიანობა  უნდა იყოს აქტიური, შემოქმედებითი, საინტერესო. სერიოზულად  უნდა ვიფიქროთ, ხვალ რას გავაკეთებთ გენდერული კუთხით. მოხარულები ვიქნებით, თუ  გავხდებით პირველები იმაში, რაც ჯერ სხვას არ გაუკეთებია", - აღნიშნა გიორგი შავგულიძემ.

პროექტი ხორციელდება გაეროს  ქალთა  ორგანიზაციის  

გენდერული  თანასწორობის ფონდის მხარდაჭერით

საინტერესოდ წარიმართა ვორკშოპი გოგონებთან, რომლის განხილვის თემა იყო ოჯახური კონფლიქტები და მათი მართვის მექანიზმები.

მონაწილეებმა ცოცხალი მაგალითებით განიხილეს, როგორ იწყება და ვითარდება ოჯახური კონფლიქტები, როგორ „ჩნდება" მსხვერპლი და მოძალადე.

ახალგაზრდების აზრით, ოჯახური კონფლიქტები ყოველთვის არსებობდა, მხოლოდ არ ხმაურდებოდა იმ მოტივით, რომ საქმე ამ ოჯახების პრესტიჟს ეხებოდა.

მონაწილეები მიიჩნევენ, რომ ძალადობის წინაპირობა კონფლიქტია. რაც უფრო მეტად ღრმავდება დაპირისპირება, მით უფრო ნაკლებია მისი მოგვარების შანსი.

ქუთაისსა და სენაკში გამართულ ვორკშოპებზე მონაწილეებმა დააფიქსირეს, რომ ახალი თაობა უფრო მეტად არის ინფორმირებული საკუთარ უფლებებზე, ეს კი ხელს უწყობს პრობლემის მოგვარებას.

პროექტი ხორციელდება  ორგანიზაცია Brot für die Welt – Evangelischer

Entwicklunsdienst მხარდაჭერით (გერმანია)

წყალტუბოში დებატების თემად ახალგაზრდულმა ცენტრმა აარჩია ოჯახური კონფლიქტებისა და ძალადობის საკითხი. ახალგაზრდებმა ისაუბრეს ოჯახური კონფლიქტების კავშირზე ძალადობასთან, კონკრეტული მაგალითებით იმსჯელეს ძალადობის ნეგატიურ შედეგებზე, მსხვერპლისა და მოძალადის  ფსიქოლოგიაზე.

შეხვედრაზე აღინიშნა, რომ ხშირ კონფლიქტს ძალადობამდე მივყავართ. რაც  მეტი გვეცოდინება კონფლიქტის მართვის „საიდუმლოებაზე", მით უფრო ადვილად ავიცილებთ თავიდან ძალადობას.

პროექტი ხორციელდება ორგანიზაცია „ქალები ქალებისათვის"

(Kvinna till Kvinna) მხარდაჭერით (შვედეთი)