...

ფონდი „სოხუმი" გასული წლის ბოლოს (ოზურგეთისა და ახალციხის არასამთავრობო ორგანიზაციებთან ერთად) ჩაერთო ძალადობისაგან დაცვის ეროვნული ქსელის პროექტში „რეაბილიტაცია თავისუფლებისათვის".

ტრენინგი სიახლე იყო ფონდისთვის, რადგან პირველად გვიწევდა მუშაობა პირობით მსჯავრდებულებთან და რისკის ზონაში მყოფ არასრულწლოვან ბიჭებთან.

ორივე ტრენინგი  პრობაციის ეროვნულ ბიუროში ჩატარდა შემდეგ თემებზე: ეფექტური კომუნიკაცია, კონფლიქტი და მისი მოგვარების ალტერნატიული გზები, ასერტიული ქცევა.

ტრენინგზე აქტიურად მუშაობდა ფსიქოლოგი. მუშაობაში ჩაერთო ფონდი „სოხუმის" ფორუმ-თეატრიც.

მონაწილეები კმაყოფილები დარჩნენ. მათ სურვილი გამოთქვეს, კიდევ დაესწრონ ტრენინგებს, სოციალურმა მუშაკებმა და ოფიცრებმა კი მუშაობის გაგრძელება გადაწყვიტეს ჩვენს ორგანიზაციასთან.

ახალი წლიდან თანამშრომლობა განახლდა.

21 იანვარს ჩატარდა შეხვედრა პრობაციონერ ქალებთან. გაცნობის შემდეგ მათთან გაიმართა მუშაობა მენტალური ასოციაციური ბარათების მეშვეობით - თითოეულმა მათგანმა იპოვა თავისი თავი, სხვებს გაუზიარა გადატანილი მძიმე დღეების შესახებ.  სამსაათიანი მუშაობის შემდეგ ისე დაახლოვდნენ, რომ ერთმანეთს საკონტაქტო ინფორმაციაც გამოართვეს და მომავალი შეხვედრების სურვილიც გამოთქვეს.

ფონდი „სოხუმის" წარმომადგენელი ოზურგეთის მე-4 საჯარო სკოლის პედაგოგებსა და მოსწავლეებს შეხვდა - გააცნო ფონდი „სოხუმის" მუშაობა, აღნიშნა, რომ ოზურგეთში ჩამოყალიბდა გენდერული საკონსულტაციო საბჭო.

სკოლა 120 წელზე მეტს ითვლის. რუსულენოვან სკოლაში ამჟამად მხოლოდ ქართული სექტორი დარჩა, თუმცა სკოლაში დღემდე სწავლობენ ეროვნული უმცირესობის წარმომადგენლები - რუსები, სომხები, იეზიდები...

როგორც სკოლის დირექტორი ტარიელ კალანდაძე აცხადებს, სკოლაში ყველანაირი პირობაა შექმნილი, რათა მოსწავლეებმა ნორმალური სწავლა-განათლება მიიღონ. მაგრამ  ერთ-ერთი პრობლემაა ის, რომ არ არის სპორტული დარბაზი. არადა, როგორც გვითხრეს, სკოლის ეზოში არის შენობა, რომელიც შეიძლება გადაკეთდეს სპორტულ დარბაზად, მაგრამ ამისათვის საჭირო სახსრები სკოლას არ გააჩნია.

სწორედ ამ პრობლების გატანა სთხოვეს ფონდი „სოხუმის" წარმომადგენელს ახალშექმნილ გენდერულ საკონსულტაციო საბჭოზე.

პროექტი ხორციელდება გაეროს  ქალთა  ორგანიზაციის  

გენდერული  თანასწორობის ფონდის მხარდაჭერით

ოზურგეთთან ფონდი „სოხუმის" თანამშრომლობის ახალი ეტაპი დაიწყო ახალშექმნილი გენდერული საკონსულტაციო საბჭოს მუშაობით.

ოზურგეთის მუნიციპალიტეტის საკრებულოს სხდომათა დარბაზში ჩატარდა გენდერული საკონსულტაციო საბჭოს პირველი შეხვედრა. არჩეულ იქნა საბჭოს მმართველობა: თავმჯდომარედ - საკრებულოს წევრი ლელა ნაცვალაძე, ხოლო მოადგილედ - საკრებულოს წევრი კახა ღლონტი.

განხილულ იქნა საბჭოს დებულების პროექტი, შემუშავდა საქმიანობის სტრატეგია. საბჭოს წევრები მზად არიან, საკუთარი გამოცდილება შემატონ საქმეს და იმუშაონ ისე, რომ პროექტი პროექტისთვის არ დარჩეს. დაფიქსირდა, რომ ადგილობრივ დონეზე ბიუჯეტისა და სოციალური პროგრამების დაგეგმვასა და შემუშავებაში სამოქალაქო საზოგადოების მონაწილეობა უზრუნველყოფს არსებული ხარვეზების გასწორებას, მოსახლეობის სხვადასხვა ჯგუფის გენდერული საჭიროებების გათვალისწინებას.

 http://www.guriismoambe.com/ 

პროექტი ხორციელდება გაეროს  ქალთა  ორგანიზაციის  

გენდერული  თანასწორობის ფონდის მხარდაჭერით