...

„კარგია მაყურებლის როლში ყოფნა, თუმცა მეტად მნიშვნელოვანია გახდე მონაწილე წარმოდგენებისა, როცა შენი მოქმედებით „არას" უცხადებ ძალადობას. დიდი მადლობა, რომ მომეცა პრობლემის გადაჭრის შესაძლებლობა," - აღნიშნა გიორგი ბურჯანაძემ, ფორუმ-თეატრის მაყურებელმა ქუთაისის აკაკი წერეთლის სახელობის სახელმწიფო უნივერსიტეტში გამართული წარმოდგენის შემდეგ.

სტუდენტები მიიჩნევენ, რომ მსგავსი ფორმით ძალადობის პრობლემის განხილვა ძალიან ეფექტურია, რადგან მაყურებელს საშუალება აქვს გაიაზროს პრობლემის მასშტაბურობა და იფიქროს გამოსავალზე.

დისკუსიისას სულ უფრო ხშირად ისმოდა ფრაზები, რომ აუცილებელია ეს წარმოდგენები რაც შეიძლება მეტმა ადამიანმა ნახოს, რათა მთელმა საზოგადობამ  იგრძნოს პასუხისმგებლობა იმ ადამიანების მიმართ, რომლებიც ოჯახური ძალადობის მსხვერპლნი არიან.

პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.

ფონდ „სოხუმში" ძალადობის თემაზე გადაღებული ფილმის ჩვენება მოეწყო, რომელსაც  ქუთაისის სხვადასხვა სკოლის 33 მოსწავლე დაესწრო. ფილმი „ერთ ჩვეულებრივ დღეს" 2009 წელს გადაიღეს მოსწავლე გოგონებმა ფონდი „სოხუმის" ერთ-ერთი პროექტის ფარგლებში.

სცენარი ძალადობას და მისგან გამოწვეულ უამრავ პრობლემას ეხება. ფილმის გმირთან არავინ მეგობრობს, რადგან მას ლოთი მამა ჰყავს და მის ოჯახში მუდმივი ძალადობაა... სწორედ ეს უბიძგებს გოგონას თვითმკვლელობისკენ...

ფილმმა აქტიური დისკუსია გამოიწვია. იყო აზრები, რომ თვითმკვლელობა არ არის გამოსავალი, რომ გოგონას უნდა გამოენახა ძალა და  მიეღწია კარგი მომავლისთვის. ტრაგიკული დასასრულის შეცვლაზეც იფიქრეს მონაწილეებმა, თუმცა, მათი აზრით: ფილმმა სწორედ ტრაგიზმით თქვა  სათქმელი...

შეხვედრამ მიაღწია მიზანს: ამ ფილმით  შეახსენა ახალგაზრდებს, რომ პრობლემური ოჯახის ბავშვებს ზურგი არ უნდა აქციონ. პირიქით - აპოვნინონ ის, რაც ოჯახში აკლიათ და ხელი შეუწყონ  ნორმალურ განვითარებაში.

პროექტი ხორციელდება ჩეხეთის ორგანიზაცია PIN-ის (People in Need) მხარდაჭერით.

- მნიშვნელოვანია, რომ  წელს, ადგილობრივ ბიუჯეტში პრიორიტეტული გახდა სოციალური სფერო, რაც მოსახლეობის სოციალურ- ეკონომიკური მდგომარეობის გაუმჯობესებას შეუწყობს ხელს. - ასე დაიწყო  საუბარი ფოთში ჩატარებულ ამომრჩეველ ქალთა კლუბის შეკრებაზე  ქალბატონმა დარეჯან ცხვიტარიამ (სოციალურ საკითხთა კომისიის თავმჯდომარე) და მონაწილეებს ადგილობრივი ბიუჯეტი გააცნო.

კლუბის წევრები მიღებული ინფორმაციას ღირებულს უწოდებენ, რადგან უკვე აქვთ წარმოდგენა რას  ითვალისწინებს ადგილობრივი ბიუჯეტი.

 ადვოკატირების ხუთკაციანი ჯგუფი განაგრძობს ადგილობრივი მოსახლეობის პრობლემების ადვოკატირებაზე მუშაობას.

შეხვედრაზე, ფოთში ჩასახლებული აფხაზეთიდან დევნილების პრობლემები გამოიკვეთა: ითქვა რომ, დაბინძურებულია დევნილთა დასახლების შემოგარენი, მომრავლებულია ქვეწარმავლები, რაც საფრთხეს უქმნის იქ მცოვრებ ადამიანებს.

აღნიშნული პრობლემის მოსაგვარებლად ადვოკატირების ჯგუფი სანეპიტსადგურს მიმართავს.

პროექტი ხორციელდება დემოკრატიის ნაციონალური ფონდის(ვაშინგტონი) მიერ (NED)