...

ფონდი  „სოხუმი"  საერთაშორისო საინფორმაციო კამპანიაში

„16 აქტიური დღე ქალთა მიმართ ძალადობის წინააღმდეგ"

 

 ტრადიციულად, 25 ნოემბრიდან 10 დეკემბრამდე, ფონდი „სოხუმი" ჩართულია ყოველწლიურ საერთაშორისო-საინფორმაციო კამპანიაში ქალთა მიმართ ძალადობის წინააღმდეგ.

   საერთაშორისო კამპანია 22 წელს ითვლის და მისი ძირითადი ლოზუნგია „ბოლო მოვუღოთ ქალთა მიმართ ძალადობას".

 კამპანიაში ჩართულ მსოფლიოს კეთილი ნების   ადამიანებს, მესამე წელია, აერთიანებთ  სლოგანი  „სახლში მშვიდობიდან - მსოფლიოში მშვიდობამდე", იმის ღრმა გაცნობიერებით, რომ   მშვიდობა მსოფლიოში გადაჯაჭვულია მშვიდობასთან -  ოჯახში.

ფონდი „სოხუმის" ორგანიზებით დასავლეთ საქართველოს ქალაქებსა და  რაიონებში, სოფლებში  (ქუთაისი, წყალტუბო, ხონი, ფოთი, ოზურგეთი, ბათუმი, სენაკი, ზუგდიდი, ხურჩა, კოკი) ფონდის წევრები, მოხალისეები, პარტნიორები და ბენეფიციარები აწყობენ საინფორმაციო აქციებს, სადაც გავრცელდება საინფორმაციო ფურცლები, პოსტერები, კალენდრები.

კამპანიის ფარგლებში გაიმართება შეხვედრები ადგილობრივ და ცენტრალურ სახელისუფლებო სტრუქტურებთან, საზოგადოების სხვადასხვა ჯგუფთან. ჩატარდება მრგვალი მაგიდები, დებატები, ფილმების ჩვენება და დისკუსიები, სატელევიზიო და რადიოგადაცემები, ფორუმ-თეატრის წარმოდგენები, ქალთა ნამუშევრების გამოფენა-გაყიდვა.

 მთელი კამპანიის განმავლობაში სხვადასხვა მედიასაშუალებით გავა სოციალური კლიპები, გაიკვრება ბანერები და პლაკატები.  კამპანიის სულისკვეთებას ეხმიანებიან და სხვადასხვა ფორმით ერთვებიან სოციალური ინსტიტუტები, კერძო კომპანიები, კულტურის, ჯანდაცვისა და საგანმანათლებლო   დაწესებულებები.

 

 ...ჩვენი დუმილის ფონზე, თითქმის ყოველდღე, ახალ-ახალი ოჯახური დრამის შემსწრე ვხდებით.

...ყოველი ახალი ტრაგედია გვახსენებს ჩვენს სამოქალაქო პასუხისმგებლობას იმ ქალების, ბავშვების, მოხუცების წინაშე, ვისაც ჰქონდა უფლება, ეცხოვრა ძალადობის გარეშე.

იმის გამო, რომ ისინი  დაუცველი აღმოჩნდნენ მოძალადის წინაშე,  ბევრ მათგანზე, სამწუხაროდ,  წარსული დროით გვიწევს საუბარი...

 

   ცნობიერების ამაღლება იმ კუთხით, რომ გაიზარდოს სახელმწიფოს და ყოველი ჩვენგანის  ძალისხმევა ძალადობისაგან დასაცავად - გვინდა ამ იდეის გარშემო კიდევ ერთხელ გავაერთიანოთ ჩვენი საზოგადოება, რამეთუ  გზა მშვიდობიან მსოფლიომდე - მშვიდობიან ოჯახებზე გადის.

 

საკონტაქტო ინფორმაცია:

კულტურულ-ჰუმანიტარული ფონდი "სოხუმი”

ქუთაისი, მგალობლიშვილის 6. ტ. 27-29-02

women@fundsokhumi.ge

www.fundsokhumi.ge

გენდერული საბჭოები - ახალი ინსტიტუციონალური მოდელი გენდერული

ცვლილებებისათვის რეგიონებში

 

2013 წლის 1 სექტემბრიდან 2016 წლის 1 სექტემბრამდე კულტურულ-ჰუმანიტარული ფონდი „სოხუმი" ახორციელებს პროექტს „გენდერული საკონსულტაციო საბჭოები - ქალთა როლის ამაღლება რეგიონებში სოციალური ცვლილებებისთვის".

პროექტს აფინანსებს გაეროს ქალთა ორგანიზაციის გენდერული თანასწორობის ფონდი, ხოლო მას ახორციელებს ფონდი „სოხუმი" საქართველოში გაეროს ქალთა ორგანიზაციასთან კოორდინაციით.

პროექტი მიზნად ისახავს ქალთა მონაწილეობის გაზრდას ადგილობრივ დონეზე გადაწყვეტილებების მიღების პროცესში, რასაც უზრუნველყოფენ დასავლეთ საქართველოს სამ ქალაქში (ქუთაისი, სენაკი, ოზურგეთი) შექმნილი გენდერული საკონსულტაციო საბჭოები. საბჭოების შემადგენლობაში შევლენ ადგილობრივი საკრებულოს  წევრები და  სამოქალაქო აქტივისტი ქალები და მამაკაცები (დევნილი და ადგილობრივი მოქალაქეები, ეთნიკური უმცირესობების, მედიისა და არასამთავრობო ორგანიზაციების წარმომადგენლები).

ყოველწლიურად, გენდერული საკონსულტაციო საბჭოები ჩაატარებენ ადგილობრივი თვითმმართველობის პოლიტიკისა და ბიუჯეტების გენდერულ ანალიზს, შეიმუშავებენ რეკომენდაციებს გენდერული კომპონენტების გასათვალისწინებლად ადგილობრივ ბიუჯეტებში და ლობირებას გაუწევენ მათ. საბჭოები შეისწავლიან ადგილობრივ გენდერულ საჭიროებებს, რის საფუძველზეც შეიმუშავებენ პროექტებს და წარადგენენ მათ ადგილობრივ საკრებულოებში თანადაფინანსებისათვის.

პროექტი ხელს შეუწყობს ადგილობრივი ხელისუფლებისა და საზოგადოების ცნობიერების ამაღლებას გადაწყვეტილების მიღების დონეზე ქალთა წარმომადგენლობის და მათი როლის გაზრდის საჭიროებაზე  რეგულარული შეხვედრების, საინფორმაციო კამპანიისა (ჟურნალი, ვებ-გვერდი, ფეისბუქ-გვერდები, სატელევიზიო და რადიოგადაცემები) თუ მრგვალი მაგიდების საშუალებით.

გენდერული საკონსულტაციო საბჭოები მჭიდრო თანამშრომლობას გეგმავენ საქართველოს პარლამენტის გენდერული თანასწორობის საბჭოსთან.

მოსალოდნელი შედეგები:

·         სამ ქალაქში შექმნილმა გენდერულმა საკონსულტაციო საბჭოებმა (ინსტიტუციონალური მექანიზმის მოდელი) ხელი შეუწყვეს ადგილობრივ ბიუჯეტებსა და პროგრამებში გენდერული კომპონენტების დანერგვას.

·         ინფორმირებულმა მოქალაქეებმა სამიზნე ქალაქებში მხარი დაუჭირეს ქალთა წარმომადგენლობას და მათი როლის გაზრდას გადაწყვეტილების მიღების ადგილობრივ დონეზე.

·         გენდერული საკონსულტაციო საბჭოების ქსელმა ადვოკატირება გაუწია ადგილობრივ დონეზე გენდერული თანასწორობის მექანიზმის ინსტიტუციონალიზაციის შესახებ ცვლილებებს გენდერული თანასწორობის ეროვნულ სამოქმედო გეგმასა და ადგილობრივი თვითმმართველობის შესახებ საქართველოს ორგანულ კანონში.

 გენდერული საკონსულტაციო საბჭო - ეს არის გაერთიანებული რესურსები, ახალი ცოდნა და უნარები, თანამშრომლობა სახელმწიფოსა და საზოგადოებას შორის, ურთიერთპასუხისმგებლობა გენდერული თანასწორობის მისაღწევად.

გენდერული საკონსულტაციო საბჭო - არის ადგილობრივი დონის ახალი ინსტიტუციონალური მექანიზმი, ახალი მოდელი ქართულ კონტექსტში.