 |
ფონდი „სოხუმის" სამშვიდობო ბიბლიოთეკა კიდევ ერთი პუბლიკაციით გამდიდრდა. პუბლიკაცია „ქალები მშვიდობის ძიებაში" ერთობლივი ქართულ-აფხაზური პროექტის შემაჯამებელი დოკუმენტია - საქართველოში მცხოვრებ ქალთა შეხედულება მშვიდობიან მომავალზე. პუბლიკაციის ავტორია ეკატერინე გამახარია, ადამიანის საერთაშორისო უფლებების მაგისტრი, არასამთავრობო ორგანიზაციების დამოუკიდებელი კონსულტანტი და მწვრთნელი.
პროექტი განახორციელეს კულტურულ-ჰუმანიტარულმა ფონდმა „სოხუმმა" და აფხაზეთის ქალთა ასოციაციამ შვედეთის საერთაშორისო ქალთა ფონდის Kvinna till Kvinna-ს მხარდაჭერით.
ერთობლივი ქართულ-აფხაზური პროექტის გრძელვადიანი მიზანია გენდერული მიდგომის დამკვიდრება ქართულ-აფხაზური კონფლიქტის მოგვარებაში.
პუბლიკაცია ხუთი ნაწილისაგან შედგება და ის გამოიცა ქართულ (სრული ვერსია), რუსულ და ინგლისურ ენებზე (შემოკლებული ვერსიები).
|
|
 |
კიდევ ერთი საინტერესო წიგნით შეივსო ფონდი „სოხუმის" ბიბლიოთეკა. წიგნის ავტორია ეკატერინე გამახარია - დამოუკიდებელი ექსპერტი, საერთაშორისო მაგისტრი ადამიანთა უფლებების საკითხებში.
ეს არის დამხმარე სახელმძღვანელო „ადგილობრივი ხელისუფლება და გენდერი".
სახელმძღვანელო მომზადდა ფონდი „სოხუმის" პროექტის „იგპ ქალების ადგილობრივ საზოგადოებაში ინტეგრაციის ხელშეწყობა მათი ადგილობრივი ხელისუფლების საქმიანობის მონიტორინგში ჩართვით" ფარგლებში, საქართველოში ამერიკის შეერთებული შტატების საელჩოს მხარდაჭერით.
პროექტი ხორციელდება საქართველოში აშშ-ს საელჩოს მხარდაჭერით. |
|
 |
ფონდმა „სოხუმმა" გამოსცა წიგნი „გენდერი და პოლიტიკური პარტიები". მისი ავტორი, დამოუკიდებელი ექსპერტი ეკატერინე გამახარია მიმოიხილავს საქართველოს პოლიტიკურ მდგომარეობას და აჯამებს ფონდი „სოხუმის" მიერ ჩატარებული სოციოლოგიური კვლევის შედეგებს.
მოცემული კვლევა მიზნად ისახავს საქართველოს პოლიტიკური პარტიების შიდა სტრუქტურების გენდერული მიდგომების შესწავლას და გენდერული კომპონენტების ანალიზს მათ პოლიტიკურ პროგრამებში. აგრეთვე, პარტიების მიმართ კონკრეტული წინადადებების შემუშავებას, რომელთა გამოყენებაც ხელს შეუწყობს გენდერული ბალანსის მიღწევას და გენდერული მიდგომების ეფექტურ დანერგვას პროგრამულ დოკუმენტებსა და პოლიტიკური პარტიების საქმიანობაში.
პროექტი ხორციელდება „საერთაშორისო განგაშის" (International Alert, დიდი ბრიტანეთი) მხარდაჭერით.
|
|
 |
კანონი ოჯახში ძალადობის შესახებ, კანონის მიზანი, ძალადობის სახეები, ძალადობის გამოვლენისა და აღკვეთის მექანიზმები, დამცავი და შემაკავებელი ორდერი, ძალადობის მსხვერპლის დროებითი საცხოვრებელი, მოძალადეთა სარეაბილიტაციო ცენტრები - ამ და სხვა საკითხებზე იძლევა პასუხებს ფონდი „სოხუმის" იურისტთა ჯგუფის მიერ მომზადებული ბროშურა „ოჯახში ძალადობის პრევენცია".
ეს ბროშურის მეორე, შევსებული გამოცემაა, რომელიც უფასოდ დაურიგდება ახალგაზრდებს.
პროექტი ხორციელდება: გერმანიის ორგანიზაცია EED-ს, ეკლესიათა განვითარების სამსახურის მხარდაჭერით.
|
|
 |
ეს არის საოცარი წიგნი ომსა და მშვიდობაზე, მტრობასა და სიყვარულზე, ქალებზე, ბავშვებზე, სიცოცხლეზე, იმედზე...
წაიკითხეთ, აუცილებლად წაიკითხეთ წიგნი, რომელიც ფონდ „სოხუმში" ითარგმნა ქართულ ენაზე!
ელვირა გორიუხინა - პროფესორი, ფსიქოლოგი, ფილოსოფოსი, ეთნოკონფლიქტოლოგი, ჟურნალისტი...
ელვირა გორიუხინა - მასწავლებელი ნოვოსიბირსკიდან - ასე გვეცნაურება თავად.
საოცარი ქალბატონი, რომელიც ათი უსაშველოდ გრძელი წელიწადი დადიოდა ომის ბილიკებზე აფხაზეთში, ყარაბაღში, სუმგაითში, ცხინვალში, ჩეჩნეთში, ინგუშეთში...
დადიოდა და ომის საშინელებას უადვილებდა ადამიანებს, რადგან მიაჩნია, რომ „უბედურება მარტოობაში ორმაგდება".
დადიოდა, რომ გადაერჩინა სიკეთის მარცვალი, ეთხოვა პატიება, ეჩუქებინა სიყვარული და იმედი...
„მასწავლებლის მოგზაურობა კავკასიაში" - ასეთი მოკრძალებული სათაური აქვს წიგნს.
ეს - უდიდესი ჰუმანისტი ქალის პოეტური აღსარებაა. უდიდესი მშვიდობისმყოფელი ქალის პროტესტია ყოველგვარი ომის წინააღმდეგ.
წაიკითხეთ, აუცილებლად წაიკითხეთ ეს წიგნი და კიდევ ერთხელ მიხვდებით, რატომ არ შეიძლება ომი!
|
|
 |
„ეს არ არის მხატვრული ჟანრის წიგნი, არც სახელმძღვანელოა, არც საინფორმაციო გამოცემა,
თუმცა ამ ხასიათის წიგნების ელემენეტებსაც იპოვის მასში მკითხველი, ეს ოციოდე ქალის საუბარია, მათ მიერ განცდილი ომი და მშვიდობაა, მათი რწმენისა და იმედის გამოხატულებაა. ყველაზე მთავარი, რაც სტრიქონებს შორის იკითხება, არის ქალის მშვიდობისმოსურნეობის საოცარი ძალა, რომელიც ყოველთვის მეტია, ვიდრე მტრობა, სიძულვილი და ყოველთვის სიკეთისაკენ, სიყვარულისაკენ და სიცოცხლის მარადიულობისაკენ არის მიმართული"...
ეს სიტყვები აქვს წამძღვარებული წიგნს „მშვიდობისმყოფელ ქალთა დიალოგი".
ფონდი „სოხუმის" ეს ახალი გამოცემა დაიბეჭდა საქართველოსა და რუსეთის წარმომადგენელ ქალთა კონფერენციის მასალების მიხედვით (ქართულ და რუსულ ენებზე).
წიგნი სტენოგრაფიულ ჩანაწერებზეა აგებული და სრულად გამოხატავს კონფერენციის მონაწილე ქალების ხედვას. იგრძნობა მათი განსაკუთრებული სამშვიდობო განწყობა, მათი ოპტიმიზმი და მზადყოფნა, ყველაფერი გააკეთონ მშვიდობისათვის. ეს აისახა კიდეც მშვიდობისმყოფელ ქალთა მომავალი საქმიანობის გეგმაში.
რაც მთავარია, წიგნიდან ჩანს, რომ თბილისის კონფერენცია დიალოგის დასაწყისია მხოლოდ.
პროექტი ხორციელდება შვედეთის ქალთა ორგანიზაცია „ქალები ქალებისათვის" (KVINNA TILL KVINNA) მხარდაჭერით. |
| |
